LEGAZPI CITY—Pighayag kan state weather bureau na shear line an weather condition na makakaapektar sa rehiyong Bicol.
Segun ki Weather Specialist Jun Pantino, sa intrevista kan Bombo Radyo Legazpi, huli digdi piglalaoman na makakaeksperyensya nin mga pag-uuran asin makukusog na hukol sa kadagatan an rehiyon sagkod sa mga masunod na tolong aldaw.
Huli man sa shearline magin kan amihan an nakataas man an gale warning signal sa sirangang parte kan Pilipinas kabale na an Kabicolan partikularmente an isla provincia kan Catanduanes.
Dugang ni Pantino na padagos man na makakaeksperyensya nin malipot na temperatura urog na sa primerong semana kan Pebrero huli sa nag-iiral na Siberian wind sa Bicol asin norteng Luzon.
Mientrastanto, sa presente wara man na pigbabantayang bagyo o low pressure area sa laog kan Philippine Area of Responsibility.
