LEGAZPI CITY-Pinalagan ni Megastar Sharon Cuneta an anumang koneksyon niya asin saiyang agom na si Senator Francis ”Kiko” Pangilinan sa mga alegasyong ipigtapok kan suboot mga dating bodyguard ni dating Ako Bicol Party-list Representative Zaldy Co, katakod kan pigsasabing pagbabarewas kan maleta nin kwarta.
Sa sarong pulong balitaan kan Hunyo 16, ipinahiling kan mga dating bodyguard ni Co an nagkapirang ladawan asin nanindugan na nakapaghatod suboot sinda nin mga maleta na igwang laog na kwarta sa manlain-lain na personalidad, kaiba an nagkapirang pulitiko asin mamamahayag.
Saro sa mga ipinahiling na ladawan, kuwa nina Sharon Cuneta asin Senator Pangilinan kaiba an suboot mga empleyado ni Co.
Alagad, warang naitaong detalye an mga testigo kun papano naikonekta an nasabing ladawan sa saindang mga alegasyon.
Sa sarong Facebook post, inapod ni Sharon na “mga utikon” an mga nagpaluwas nin ladawan.
Segun sa aktres, kuwa an ladawan kan mag-biyahe an saindang pamilya sa Marawi ngani personal na pasalamatan an mga lokal na opisyal asin residente na nagsuporta kay Pangilinan kan pirilian sa Senado taong 2025.
Dagdag pa niya, wara suboot na katwiran angparatang na igwang ipinasa sa saindang mga maleta sa nabanggit na lugar.
Mientras tanto, nagpatanid man si Pangilinan na papanimbagon niya an mga nasa likod kan pagpapakalat kan mga alegasyon.
