LEGAZPI CITY – Wara man suboot na exemption na nakasurat sa saindang anti-illegal gambling campaign kun kaya maging an mga madadakop na senior citizens an papanimbagon man.
Segun ki PSupt. Nilo Berdin, hepe kan Legazpi City Police Station, wara man sa ley o dae naka-specify na exempted na an mga gurang na imbwelto sa illegal gambling kun kaya dadakupon man an sisay na maaaktuhang nagkokondusir kan iligal na aktibidad.
Sa ngunyan, nasa kulungan na suboot an nadakop kasuodma na senior citizens sa Barangay Pawa syudad kan Legazpi na binistong sinda, Florito Esplana, 75 anyos; Gloria Paz, 60 anyos; asin Elma Alaurin, 48 anyos na gabos residentes kan Purok 3.
Naaktuhan suboot kan personahes kan Legazpi CPS sa pamamayo ni SPO2 Gary Amaranto an mga suspek nagto-tong its sa residencia ni Alaurin kun kaya insigida man ining dinarakop.
Nakumpiska man an baraha, sapin, asin bet money na nagkakantidad nin P329.65.
Nahahampang an tulong suspek sa kasong pagbalgar sa Presidential Decree 1602 o an Stiffer Penalties on Illegal Gambling.
Mientrastanto, nangapudan man si Berdin na ibitaran na an pag-imbwelto sa illegal gambling huli sa aktibo na ngunyan an publiko asin dae nanghihinayang na magpaabot nin report sa kapulisan.
Kun saro sana man na libangan o past time an pagkawat nin sugal, ikaag suboot sa tamang lugar asin dapat bakong iskandaloso.
All out war an kapulisan sa illegal gambling asin matrabaho suboot sinda nin tultol ngane na dae maipadara sa Basilan siring kan ibang mga pasaway na pulis.
