LEGAZPI CITY-Kinumpirmar kan Philippine National Police (PNP) kan Martes na si Senador Ronald “Bato” dela Rosa nahiling na nagluwas sa Senado pagkatapos kan insidente nin pambabadil kan Mayo 13, 2026, sa sarong lunadan na rehistrado ki Senador Robin Padilla.
Sa isinagibong press conference sa Palasyo, ipinahiling kan hepe kan PNP na si Gen. Jose Melencio Nartatez Jr. an video footage kan sarong puting Toyota Fortuner na nagluwas sa Senado poco mas o menos alas 2:30 nin aga kan Huwebes, Mayo 14.
Dae pa man pigpapaluwas sa media kan PNP an bilog na video na soboot mahihiling si dela Rosa na naghahale sa senado
Dugang pa kan opisyal, basado sa records inquiry kan PNP, rehistrado kay Padilla an nabanggit na behikulo.
Kinumpirmar man ni Interior Secretary Jonvic Remulla na tagsadiri ni Padilla an behikulona nahihiling sa footage.
Dati nang inako ni Padilla na sadiri niya an behikulo sa video, alagad habo niyang kumpirmaron kun nakalunad digdi si dela Rosa.
Magigirumduman na kan Mayo 11, nagbalik sa Senado si dela Rosa sa kaenot-enoteng pagkakataon poon kan Nobyembre 2025 ngani magboto na pabor sa pagbabago kan liderato kan Senado.
Makalihis kaini, ibinugtak si Bato sa paagi kan sarong mosyon sa irarom kan protective custody na tulos inaprubahan kan bagong liderato sa pamumuno ni Senate President Alan Peter Cayetano.
Nangyari ini makalihis na kumpirmaron kan International Criminal Court (ICC) an iniluwas na arrest warrant kontra ki Dela Rosa katakod kan pigtutubudang papel kaini sa war on drugs kan nakalihis na administrasyon ni dating Presidente Rodrigo Duterte.
