Inusisa ni Senate Pres. Vicente ‘Sotto’ III si dating Bulacan 1st District Engineering Office asst. chief Brice Hernandez kun gurano katotoo an impormasyong iniluwas kan saiyang abogado na may anom na Senador na suboot imbuelto sa flood control scandal, basado sa impormasyong nakabugtak sa computer ni Hernandez.
Enot ining binanggit ni Atty. Raymond Fortun sa sarong panayam, makalihis suboot niyang mahiling an laog kan computer kan saiyang kliyenteng si Hernandez.
Hapot pa kan Senate President, kun nata puro Senador an pigpapangaranan o idinadawit sa kontrobersya.
Alagad sa hearing kan Senado, ipigdoon ni Hernandez na wara ining katotoohan. Sa katunayan suboot, pangaran kan mga kongresista an nakasurat o nakabugtak sa saiyang computer.
Kinatigan man ni Senate Blue Ribbon Committee Chairman Sen. Ping Lacson an punto ni Sotto asin sinabing bako patas sa mga Senador an nagin pahayag ni Fortun huli sa dakol na ispekulasyon an nagluluwas.
Segun ki Lacson, kaipuhang magin maingat an abogado ni Hernandez sa saiyang ipigluluwas na impormasyon, huli sa sierto na makawsa ini nin pagkalibong sa lado kan publiko.
Nagkaigwa man suboot nin ispekulasyon na ang mga tinutukoy na Senador an sinda Sen. Sherwin Gatchalian asin Sen. JV Ejercito na dae man nabanggit an saindang mga pangaran.
