LEGAZPI CITY- Piglalaoman na an pag-abot sa aga sa Albay kan Senate Committee on Public Services sa pangengenotan ni Senator Grace Poe katakod kan ikokondusir na pagdangog sa orolay sa Tax Reform for Acceleration and Inclusion (TRAIN) Law.
Mayor na tema sa hearing sa session hall kan Albay Provincial Capitol an epekto kan nasabing ley sa public services asin utilities, partikular sa petrolyo, kuryente asin tubig.
Antes an pagdangog, nakatalaan na mag-inspeksyon muna si Sen. Poe sa Ibalong Grand Central Terminal sa Brgy. Bitano sa ciudad kan Legazpi tangarig na makaolay man an mga ordinaryong pasahero, drayber asin operator susog naman sa padagos na pagmahal kan presyo kan petrolyo siring man an presyo kan mga pangenot na barakalon.
Afuera kaini, tutukaron man an mga propuesto siring na sana kan pagtugdok kan opisina nin Land Transportation Office (LTO) sa mga banwaan kan Narra asin Brooke’s Point sa Palawan siring man sa Ticao Island sa Masbate.
Didiskutiron man sa nasabing pagdangog an mga rekomendasyon asin pondong iaalokar para sa mga naunambit na agenda.
