LEGAZPI CITY – Pigsagibo kan mga opisyales kan Barangay Bigao, Daraga, Albay an taunang senakulo festival ngonian na semana santa.
Segun ki Kapitan Ereneo Miraballes sa intrevista kan Bombo Radyo Legazpi na piglalaoman ninda na dakol an mahiling na mga deboto asin bisita sa saindang aktibidad manungod sa buhay asin pagpapakasakit ni Hesukristo.
Afuera sa nasabing pagsasadula, mahihiling man suboot kan mga madalan an kun ano an piggigibo kan mga katoliko sa pasyon ngonian na semana santa.
Pag-isturya niya na poon pa kan joven na edad pa siya an may pigsasagibo na sa saindang lugar na senakulo hasta sa napundo ini kan kasagsagan kan Covid 19 pandemic asin ibinalik niya kan magtukaw siya sa pwesto.
Mawot man kan nasabing opisyal na mahiling kan mga jovenes an importansya asin gano ka-rarom an pagsasagibo kaini tuyong mahal na araw.
Sa ngonian, igwa na sindang 48 na mga disipolos asin wara pa suboot an ibang karakter sa nasabing pagsasadula.
Huli ta mag-aga an nasabing senakulo, nakabantay an saindang mga tanod, barangay health worker, kasabay man ninda an Daraga Public Safety Office asin iba pang mga medical personel.
Pighayag pa ni Miraballes na kun iisipon suboot dakulang karahayan sa sainda an ipigbabalik kan kagurangnan kun kaya maski mapagal an preparasyon pighihingoa ninda na maisagibo ini sarong bes kada taon asin pig-imbitaran kaini an publiko na magdalan sa saindang senakulo ngonian na semana santa.
