Nagpatanid si Senador Sherwin Gatchalian laban sa talamak na smuggling asin iligal na kalakalan kan mga excisable na produkto, kabale na an sigarilyo asin vape.
Segun kay Gatchalian, an mga siring kaining gawi an nagpapababa kan ganansya sa buwis, nagkakawsa nin mga peligro sa salud, asin nagkakawsa nin mga problema sa katoninungan asin kaayusan.
Susog sa datos kan Bureau of Internal Revenue (BIR), padagos an pagbaba kan koleksyon kan excise tax, na uminabot sana sa P130.9 bilyon poon Enero hasta Nobyembre kan nakaaging taon.
Ini an mas hibaba kumpara sa P134.9 bilyon kan 2023, P160.3 bilyon kan 2022, asin P176.5 bilyon kan 2021.
Dugang pa kan senador, dawa buminaba an kabilugang cigarette market poon 103.3 bilyong sticks kan 2014 pasiring sa 55.6 bilyong sticks kan 2023, naghalangkaw man an market share kan iligal na kalakalan hale sa 12.2% kan 2014 pasiring sa 19.8% kan 2023.
Sa pananaw ni Gatchalian, bako bastante an enforcement sana kundi kaipuhan suboot na hilingon an iba pang ugat kan iligal na kalakalan sa Pilipinas.
