Posibleng amyendahan kan senado an saindang mga rules nganing magtao nin penalidad sa mga senador na dai nag-aatender nin mga sesyon, segun ki Sen. JV Ejercito.
Ini an kasunod kan ethics complaint laban kay Sen. Ronald ”Bato” Dela Rosa huli sa haloy na kaining pag-absent sa Senado.
Bilang chairperson kan Senate Ethics Committee, sinabi ni Ejercito na pwedeng gibuhon kan Rules Committee an nasambitang pag-amyenda asin kaipuhan na aprobaran kan plenaryo.
Segun saiya, dai pig-antisiparan na dai malaog an sarong lehislador, kaya kaipuhan na amyendahan an Senate rules bilang sarong bilog na grupo.
An reklamo laban ki Dela Rosa an isinangat kan grupong civil society na Wag Kang KuCorrupt, alagad pwedesir ining ibasura tulos huli ta wara pang eksistidong polisiya kan Senado manungod sa “no work, no pay.”
Poon pa kan Nobyembre 11 kan nakaaging taon, dae na nakaatendir nin mga sesyon si Dela Rosa makalihis na sabihon ni Ombudsman Boying Remulla na igwang mandamiento de aresto gikan sa International Criminal Court (ICC) kontra sa senador.
Piglinaw ni Ejercito na procedural sana an desisyon sa ethics complaint asin bakong pagprobar na protehiran an katrabaho.
