Naghahanda na liwat an Senado na buksan an imbestigasyon ‘in aid of legislation’ manungod sa flood control scandal, sa Lunes, Enero 19.
Gigibohon an hearing mantang nasa recess an Congreso, basado sa motu proprio authority kan Senate Blue Ribbon Committee, na pangenot na nagkokondusir nin mga hearing sa nabuyagyag na mahiwas na korapsyon.
An pagdangog mapoon nin ala-una nin hapon.
Segun ki Senate President Vicente Sotto III, naghagad na siya sa Department of Public Works and Highways (DPWH) nin nagkapirang opisyal asin importanteng dokumento sa paagi nin subpoena duces tecum, na piglalaoman na makakatabang sa mas hararom na imbestigasyon.
Parte ini kan kamawotan kan komite na pagsararoon an gabos na files na may kinaaraman sa flood control scandal, kaiba na an mga controbersyal na Cabral files.
Kinumpirmar man ni committee chair Sen. Panfilo Lacson na igwang sadiring kopya kan nasambitang mga files an saiyang komite.
An nasabing kopya an dati nang kapot kan komite antes pa man an pinal na desisyon na buksan giraray an imbestigasyon.
Dati nang kinumpirmar ni Sotto na nagpirma siya nin 12 subpoena para sa mga darakulang personalidad, kabali an mga minasunod:
Dating DPWH Secretary Manuel Bonoan,
Dating Rep. Zaldy Co,
Dating DepEd Usec Trygve Olaivar,
Dating COA Commissioner Mario Lipana,
Dating DPWH Director Gerald Opulencia,
Dating DPWH Director Gerald Pacanan,
Maynard Ngu,
Orly Guteza,
John Paul Estrada,
Mark Teksay,
Arjay Domasig,
Carleen Yap-Villa
Afuera ki Co asin Bonoan na parehong kumpirmadong nasa abroad, wara pang kumpirmasyon kung makakaatendir an sampulong iba pa na pinadarahan man nin subpoena.
