LEGAZPI CITY-Nangapudan si Senator-Judge Camille Villar nin paggalang sa saiyang mga kapwa senador pagkatapos na magin emosyonal mantang pigkokontra an mga sinabi ni Senator-Judge Erwin Tulfo manungod sa mga senador-judges na presenteng detenido asin dai kayang mag-atender sa impeachment trial.
Durante kan saiyang interpolasyon, nag-insistir si Tulfo sa pangangaipo na siyasaton kun pano an presenteng mga sirkumstansya—partikularmente an dai pagpartisipar kan nagkapirang senador sapaglilitis—na nakakaapektar sa computation kan two-thirds vote.
Nanidugan man ni Tulfo na posibleng dai suboot naisaalang-alang kan mga framers kan 1987 Constitution an presenteng sitwasyon, kun saen an mga senador napapaatubang sa mga kasong arog kan plunder asin iba pang criminal charges.
Bilang simbag, nagin emosyonal digdi si Senador-Judge Camille Villar asin idinepensa an saiyang mga detenidong kapwa senator-judges.
Ipinag-asegurar ni Villar na an saindang pag-absent sa impeachment, bakong bagay na pinili asin tinawan nin duon na dai pa sinda nasentensiyahan sa mga kasong inaatubang ninda.
Sinabi niya na likayan an personal na mga pag’atake asin papagdanayon an paggalang sa lambang saro.
Sinabi niya na an mga senador na ini, dai pa napatunayan na nagkasala asin dai dapat apodon na mga plunderer o parahabon.
Sa sarong kasunod na manipestasyon, nilinaw man ni Senador-judge Tulfo na dai niya sinabi na an mga detenido na senador-judges, an nasentensiyahan na.
Ipinaliwanag niya na an pigtutukoy niya, iyo an mga senador na “Charged with” kan mga nasabing kaso asin bako mga nahatulan o convicted sa mga offense
