LEGAZPI CITY-Pig-postpone muna an selebrasyon kan Pinangat Festival sa banwaan kan Camalig, Albay huli sa padagos na abnormalidad kan Bulkang Mayon asin konsiderasyon kan lokal na gobierno sa pagtitipid sa enerhiya.
Segun kay LGU Camalig Public Information Officer Tim Florece sa intrevista kan Bombo Radyo Legazpi sa paagi kan Executive Order No. 13 series of 2026 na pig-postpone muna ini mantang orihinal na pigseselebrar sa Hunyo huli sa sitwasyon kan Mayon Volcano asin sa pagsunod kan lokal na gobierno sa pigpapaotob na energy asin oil conservation measure, siring man an heat index asin nasa state of calamity pa an banwaan.
Kaya napagdesisyunan na i-postpone ini ngonian na taon kasabay an Mdrrmo asin Camalig Municipal Tourism and Cultural Heritage Council.
Sinabi pa ni Florece na pigbibisto an kultura, pamana, asin heritage kan banwaan alagad mas prayoridad kan lokal na gobierno an kaligtasan kan gabos orog na an mga apektadong residente sa Camalig mantang dai pighahale an posibilidad na maitaas pa sa alert level 4 kan Phivolcs an bulkang Mayon.
Enkaso itaas sa alert level 4 an bulkang Mayon, posible suboot na maapektaran an humigit-kumulang 2,700 na mga pamilya.
Posible man suboot na magdakol an demand kan LGU asin dakulang pondo an kinakaipuhan kaya pigkokonsiderang alanganin an selebrasyon, mantang igwang mga nagsasakit na mga residente.
Padagos man an paghahatod kan mga local services nin mga asistensya sa mga apekatdong residente.
Mientrastanto, nag-isyu naman nin executive order an LGU Camalig nin 4 day work week asin work from home naman sa aldaw nin Biyernes afuera sa ibang mga opisina.
