Nagwalat na nin P80.80 million na kantidad nin danyos sa sektor nin agrikultura an pirang aldaw na panrarapado ni bagyong Kristine sa nasyon.
Base sa damage assessment kan Department of Agriculture (DA), nakaapektar an kalamidad sa kabilugang 2,864 na paraoma sa Cordillera, MIMAROPA, Bicol asin Western Visayas.
An kantidad kan production loss an pinagkakarkulong nasa 5,287 metrikong tonelada sakop an 1,570 ektarya ng agricultural land.
Mantang nagpapadagos na man an damage assessment sa field, pinaglalaoman na an danyos asin pagkalugi sa sektor kan agrikultura an malangkaw pa asin posibleng maapektaran pa an iba commodities.
Mientras tanto nagpreparar na an ahensiya nin mga interbensiyon para sa mga apektadong paraoma kaibanan na an agri inputs, loan hale sa Survival and Recovery program asin indemnification kan mga apektadong insured farmers sa paagi kan Philippine Crop Insurance Corp.
