LEGAZPI CITY — Dakulang pagbabago sa sektor kan agrikultura an target ngunyan kan City Agriculture’s Office para sa syudad kan Legazpi.
Kabale na digdi an mga stratehiya sa pagtanom nin paroy, cacao asin niyog.
Sa intribista kan Bombo Radyo Legazpi ki City Agriculturist Jess Callos, saiyang iniladawan an saindang isasagibong lakdang bilang “levelling up” sa paagi kan paggamit kan mga makabagong pag-aadal asin teknolohiya na magpapabaskog sa pagkabuhay kan mga paraoma.
Parte kan mangyayaring pagbabago susog sa pahayag ni Callos an pagmukna nin sarong enterprise o negosyo sa agrikultura en vez na purong produksyon sana.
Ineksplikar kaini na dapat na sabuton an katotoohan na padagos na naglolobo an ekonomiya kan Legazpi na an boot sabihon, padagos man na magdadakol an mga tawong nagpapasyar o pigpipiling magtinir sa lugar.
Katakod kaini, dapat suboot na masusteniran an pangangaipo kan bilog na populasyon urog na pag-abot sa bagas asin iba pang produkto.
Dugang pa ni Callos, kun dae magkakaigwa nin matibay na stratehiya, posibleng dae magin bastante an suplay huli sa diit sanang uma sa syudad.
Kun kaya, nagkrear nin Likha-Ani Program an ahensya para sa mga paraoma kun sain mangbabariwas sinda nin kinseng kilo nin hybrid na banhi asin sampulong bag nin fertilizer.
May kakayanan an mga hybrid na banhi na makaprodusir nin siento-kwarentang sako nin bagas kada ektarya gikan sa dating noventang sako sana.
Ngunyan na taon, nasa kwatro sientos na ektarya an saindang planong tanoman na bako sana makakatabang na masustineran an rice production sa Legazpi kundi pagpapabaskog na man sa ani kan mga paraoma na iyo an primerong magkakaigwa nin benepisyo sa nasambitan na programa.
