LEGAZPI CITY—Nakatalaang mag-operar an second marine hatchery kan Bureau of Fisheries and Aquatic Resources sa banwaan kan Libon, Albay ngunyan na papaabuton na Marso makalihis an nagkapirang delays kaini.
Segun ki BFAR 5 Fisheries Production and Support Services Division Chief Atty. Nilo B. Consuelo, sa intrevista kan Bombo Radyo Legazpi, na haman na man an hatchery alagad nagkaigwa sana suboot nin problema sa koneksyon nin kuryente kun saen nawawara an sarong application.
Kun kaya an saindang ginibo para dae na ini mahaloy iyo an pagre-construct nin sarong application nin huli ta yaon na man an transformer.
Dugang kaini na ano man na oras na matakod an transformer asin kuryente, asin mapakarhay na an commissioning kan mga ekipahe—pwedesir na suboot na magpuon na mag-operate an nasambit na hatchery.
Segun sa opisyal na maabot sa P30 milyones an pondo na ipig-alokar digdi asin kairiba na an gabos na kakaipuhan para sa paggibo kaini.
An obheto suboot kan naunambitang hatchery iyo ngani na mapundo an pag-import nin bangus fry na gikan pa sa Indonesia, siring man para mahiro na an mga dae na napapakinabangan na mga fishpond huli sa wara nang nababakal na fingerlings.
Tinawan-duon kaini na an siring na lakdang an pinakasolusyon huli na man ta dae na kayang masusteniran kan kadagatan an pangangaipo sa mga sira.
Mientrastanto, pigtaram man kaini sa publiko na magsurat sana sa saindang ahensya en kaso kaipuhan ninda nin fingerlings kan tilapia o bangus o ano man na kinakaipuhang technical assistance.
