LEGAZPI CITY — Target kan Securities and Exchange Commission (SEC) na mapunan na an ikokundusir na information drive kontra sa mga naglalakop na investment scams.
Segun ki SEC Legazpi Extension Office OIC Director Atty. Norma Olaya sa intrevista kan Bombo Radyo Legazpi, pighahanda na kan oficina an mga lectures na itutukdo sa publiko tangarig maibitaran na mabiktima nin mga scam.
Pinaglalaoman na mapupunan an pagkondusir kan lectures ngonian na Hulyo asin gigibuhon sarong bes sa sarong bulan.
Pag-eksplikar ni Olaya, mawot kan SEC na maisagibo an information campaign bako sana sa Albay kundi sa iba pang provincia sa rehiyon.
Nagtutubod an opisyal na dakol an nabibiktima kan manlain-lain na klase nin scam huli sa kakulangan sa kaaraman asin kadificilan kan buhay kaya madaling ma-engganyar kan mga tawong nagpo-promesa na papadakulaon an saindang kwarta.
Dugang pa ni Olaya na enkasong igwang mag-ofrecir nin investment, kinakaipuhan na hagadan an mga ini nin permit to solicit investment tangarig masierto na lehitimo ini.
