LEGAZPI CITY — Dae na nakasalbar sa kagadanan an sarong lalaki makalihis na manlaban sa mga otoridad sa isinagibong operasyon kan mga otoridad sa Sitio San Martin, Zone 6, Barangay Agos, Polangui, Albay.
Sa nagunong impormasyon kan Bombo Radyo Legazpi, bandang alas-9:30 kasubagong aga kan magpasiring sa lugar an pinagsarong pwersa kan Regional Police Drug Enforcement Unit 5, 1st asin 2nd Provincial Mobile Force Compnay, Provincial Intelligence Branch-Albay Police Provincial Office asin Polangui Municipal Police sa pakikipagkoordinar sa Philippine Drug Enforcement Agency (PDEA) 5 tangarig na isirbe an ibinabang search warrant.
Subject kan nasabing search si Roy Sumpay na residente kan nasabing lugar.
Napag-araman na ibinaba an nasabing warrant katakod kan pagbayolar ni Sumpay sa Section 11 asin 12 kan Republic Act 9165 o Comprehensive Dangerous Drugs Act of 2002.
Alagad kan magdeklara an mga operatiba kan pagsirbe kan search warrant, marikas na nagbulnot nin badil si Sumpay asin ipinutok sa team.
Katakod kaini, nag-retaliate man an mga operatiba na nagresulta sa pagsapar nin tama kan bala ni Sumpay sa manlaen-laen na parte kan lawas.
Idinalagan pa sa Rural Health Unit (RHU) si Sumpay alagad dae naman naisalbar pa kan attending physician.
