LEGAZPI CITY—Puga-puga an paghahanda kan Schools Division Office Legazpi City katabang kan City Government of Legazpi katakod kan hosting sa napaparaning Palarong Bicol 2026.
Segun ki Schools Division Office Legazpi City Spokesperson Santi Araña, sa intrevista kan Bombo Radyo Legazpi, sa presente nagkakaigwa na nin minor repair sa mga eskwelahan na gagamiton na billeting schools sa ciudad nganing magin preparado para sa pag-abot kan mga delegado hale sa 13 eskwelahan sa school division offices ka rehiyong Bicol.
Sa presente igwang 14 eskwelahan an pwedesir gamiton sa aktibidad alagad duwa digdi siring kan Pawa asin Oro Site an dae na magagamit bilang billeting schools huli sa harani an mga ini sa bulkang Mayon.
Huli kaini ililipat an nagkapirang billeting schools sa banwaan kan Daraga, Albay para man sa kaligtasan kan mga delegado.
Dugang niya na may pinag-ulayan na man an mga gigibohong estratehiya en kaso man na maglala an sitwasyon kan bulkan.
Piglalaoman man an dagsa kan volume kan mga maatendir na indibidwal sa Palarong Bicol 2026 sa ciudad.
Mientrastanto, pig-asigurar kan saindang opisina, lokal na gobierno kan Legazpi, asin Department of Education Region 5 an kaligtasan kan gabos na mga delagado sa nasambitang aktibidad.
