Arestado an sarong 33-anyos na truck driver makalihis na makuhanan nin iligal na droga sa laog kan Matnog Port.
Sa intrevista kang Bombo Radyo Legazpi kay PSSG Christopher Feratero, Investigator kan Matnog Municipal Police Station, an nasabing suspek an hali sa Bulacan asin pasiring kuta sa Brgy. San Isidro, Northern Samar.
Segun ki Feratero, papalaog pa sana ini sa passengers area kang madiskubre an mga droga sa paagi kan body inspection na isinagibo kang security scanner sa pantalan.
Kaiba sa mga nakumpiskar kan mga otoridad an sarong sadit na plastic asin heat sealed plastic sachet na may laog na iligal na droga asin iba pang drug paraphernalia.
Sa ngunyan, nasa kustodiya na kan Matnog MPS an suspek asin mahahampang sa kasong pagbayolar sa RA 9165 o Comprehensive Dangerous Drugs Act of 2002.
Mientrastano, pigtawang doon kan opisyal na mahigot an ginigubong pagbabantay kan kapulisan sa pantalan tanganing masiguro na wara ki makakalusot na anumang kontrabando o iligal na droga sa lugar.
