LEGAZPI CITY – Irido an sarong sibilyan makalihis na madamay sa engkwentro kan mga suldados asin mga armadong grupo sa Barangay Rizal, Dimasalang, Masbate.
Segun ki Police Captain Rocky Dinulong, an Chief of Police kan Dimasalang Municipal Police Station sa intrevista kan Bombo Radyo Legazpi na nadamay an sarong paraooma nin huli ta nakatambay suboot ini sa saiyang kubo harani sa pinangyarihan kan sagupaan.
Nagsapo nin tama sa may likodan na parte an biktima makalihis na tamaan nin ligaw na bala asin presenteng nasa stable nang kamugtakan makalihis na maidara tulos sa hospital.
Naghaloy nin limang minuto an labanan sa pagultangan kan mag-inibong na lado mantang dae mababa sa limang miyembro kan mga armadong grupo an saindang nakapalitan nin putukan.
Pigtaram pa ni Dinulong na pig-iimbestigaran pa kun gikan sa hanay kan pulisya o sa ibong na grupo an bala na tuminama sa paraooma.
Sa ibong kan may nadamay na sibiliyan, pigpasalamat man kaini na warang nalugadan sa hanay kan kasuldaduhan.
Pagirumdom kaini sa publiko na mag-ingat, magin mapag matyag sa palibot, ibitaran an pagduman sa mga lugar na may presensya kan mga teroristang grupo asin magsunod sa abiso kan gobierno nganing mamantenir an saindang kaligtasan.
