LEGAZPI CITY-Binadil an sarong school principal sa hampang kan eskwelahan sa Midsayap, Cotabato ngonian na pagka-aga, Agosto 12, 2025.
Binisto an biktima na si Arlyn Alcebar, an Principal kan Agriculture Elementary School.
Basado sa inisyal na report, nakalunad sa saiyang behikulo si Alcebar asin palaog sa eskwelahan alas 7:00 nin pagkaaga, kan siya badilon kan dae pa nabibistong mga armadong suspechado sa atubangan mismo kan gate kan eskwelahan.
Nagkawsa ini nin pagkahandal asin takot sa mga paratukdo, estudyante, asin mga magurang na naghahatod kan saindang mga aki.
Padagos man an paghahanap kan Midsayap Municipal Police sa mga suspek asin pig-aaram an posibleng motibo kan krimen.
Mientrastanto, kinondenar kan lokal na gobierno an nangyaring kariribokan asin pigsierto an mas mahigot na seguridad sa palibot kan mga eskwelahan sa lugar ngani na maibitaran na mautro pa an siring na insidente.
