LEGAZPI CITY—Naarestar an sarong persona sa kinundusir na buy-bust operation kan San Andres Municipal Police Station sa Barangay Comagaycay sa banwaan kan San Andres, Catanduanes.
Minidbid an suspetsado na si alyas “Ern”, 49-anyos, asin residente kan Purok 7, Brgy. Comagaycay.
Segun ki San Andres MPS PEMS Niel Gerona, sa intrevista kan Bombo Radyo Legazpi, nakumpiskar sa suspetsado an maabot sa 15 gramos na pinagtutubudang shabu asin may kantidad na P97,000.
Napag-araman na an suspetsado dati nang drug surenderee asin haloy na nindang pigmamanmanan.
Sa ngunyan nasa kustodiya na kan kapulisan an suspetsado asin posibleng mahampang ini sa kasong pagbalagar sa Republic Act 9165 o Comprehensive Dangerous Drugs Act of 2002.
Mientrastanto, pigtaram pa kan opisyal na padagos an saindang operasyon laban sa mga iligal na droga.
