LEGAZPI CITY – Gadan an sarong persona sa nangyaring banggaan kan duwang motorsiklo sa munisipalidad kan Manito sa provincia nin Albay.
Segun ki Manito Municipal Police Station Investigator Police Master Sergeant Jonas Cha sa intrevista kan Bombo Radyo Legazpi na basado man sa saindang isinagibong imbestigasyon, naglaog sa salang linya an personang nakaligtas sa linya na pigbabaybay kan personang nagadan.
May nakahiling man sa aksidente asin pigsabi kaini na makusog an nagin impact kan pangyayari huli ta may marikas magmaneho sa saro sa duwang imbwelto kan banggaan.
Nagsapar man nin matinding tama sa payo an biktima huli ta wara ining sulot na helmet kan mangyari an banggaan.
Pigtaram pa kan imbestigador na pigporbaran pa kutang idalagan an biktima sa hospital alagad dae na ini naisalbar pa.
Sa presente, nakarecover na an saro asin nabuburol na an sarong personang nagadan asin pighahalat ninda an desisyon kan pamilya kan nagadan kun ano an sunod nindang gigibuhon.
Tapos na suboot an imbestigasyon asin pighahalat na sana ninda an kompirmasyon kan pamilya kan biktima kun masunad nin kaso o mag-oolay na sana an mag-inibong na lado.
Pagirumdom ni Cha sa mga driver na mag-ingat an gabos asin dae paglingawan an pagsusulot nin protective equipment nganing maprotektaran an sadiri maski papano enkaso ma-imbwelto sa aksidente.
