LEGAZPI CITY—Sarong parasira an nadukayang gadan makalihis na malamos sa baybayon kan Barangay San Roque, Pandan, Catanduanes.
Segun ki Pandan MPS Patrolman Landel Icamin sa intrevista kan Bombo Radyo Legazpi, minidbid an biktima na si Jonel Trinidad Tumanlao, 33-anyos, sarong parasira asin residente kan nasambitang lugar.
Susog sa report, an biktima nawawara kan Sabado, Enero 25.
Mantang nagsisira ini kairiba an saiyang mga kapwa parasisira sa Sitio Borinay, Barangay Marambong, an biktima nagsisid sa hararom na parte kan katubigan para magpana nin mga sira.
Alagad huli sa makukusog na mga hukol an biktima dae na nakaahon pa.
Dugang pa kan opisyal na makalihis na makua an lawas kan biktima, dinara ini sa ospital na kun saen digdi napag-aramanan na nalamos an biktima.
Sa ngunyan kinua na kan pamilya kan biktima an saiyang lawas para man sa saiyang lamay.
Mientrastanto, nagpagiromdom man si Icamin sa publiko na dae na magpasiring sa kadagatan lalo na maraot an panahon.
