LEGAZPI CITY—Sarong paraoma an nagadan makalihis na anudon ini kan baha kan nakalihis na aldaw sa banwaan kan Irosin sa probinsya kan Sorsogon.
Segun ki Police Staff Sergeant Joemel Alama kan Irosin Municipal Police Station, minidbid an biktima na si Florentino Bernardo Echane, 53-anyos, residente kan Barangay Batang, Irosin kan nasambit na probinsya.
Susog sa pahayag kan pamilya, an biktima nagluwas sa harong kaini bandang alas-dose nin maaga para ilipat an saiyang ataman na karabaw, alagad dae na ini nakabalik sa saiyang harong kaya hinanap tulos ini kan saiyang pamilya.
Nakua an hawak kan biktima na wara na nin buhay sa may parte kan Sitio Manggahan, Barangay Macawayan sa parehas na banwaan, kun saen gadan man suboot an ataman na karabaw kaini.
Segun sa mga otoridad, pwedesir na naanod an biktima huli sa makusog na dalagan kan tubig sa salog sa lugar asin madiklom an kapalibutan rason para ikagadan kaini.
Mientrastanto, nagpagiromdom man an opisyal sa publiko na mag-ingat lalo na ngunyan na mauran an panahon para maibitaran an siring na mga insidente.
