LEGAZPI CITY – Irido an sarong motorista makalihis na ibangga an motor kaini sa kudal sa Brgy. Oga, Pandan Catanduanes.
Segun ki Eric Bonifacio, personahe kan Pandan Municipal Disaster Risk Reduction and Management Office sa intrevista kan Bombo Radyo Legazpi na nirespondehan ini kan saindang opisina an pasyente nin huli ta nahiling mismo ini kan saindang off duty na Emergency Rescue Team Member.
Susog sa saindang inisyal na imbestigasyon na nawaran nin preno an pigmamanehong behikulo kan biktima kun kaya nagdesisyon ining ibangga na sana sa kudal nganing dae na madamay pa an mga estudyanteng nag-aagi sa lugar kan mangyari an insidente.
Nagsapo nin gasgas an biktima sa tuhod asin menor na lugad sa hibabang parteng kan saiyang walang mata.
Sa presente, tulos man idinara sa Pandan District Hospital an biktima makalihis ining matawan nin magkakanigong asistensyang medikal.
Mensahe ni Bonifacio sa mga motorista, na permihang syertuhon an maray na kondisyon kan mga behikulo bago magbiyahe asin dae paglingawan na magsulot nin helmet para sa dugang na proteksyon urog na kun nagmamaneho.
