LEGAZPI CITY—Naarestar an sarong miyembro kan communist terrorist group (CTG) na pigkonsiderar na top 10 most wanted kan PNP Bicol sa banwaan kan Irosin, Sorsogon.
Segun ki Sorsogon PPO Spokesperson Police Major Arwin Destacamento sa intrevista kan Bombo Radyo Legazpi, minidbid an suspetsado sa alyas na “Ka Jess”, 51-anyos, residente kan Matnog sa parehong probinsya.
Naarestar an suspetsado sa saysay kan mandamiento de aresto na ipinaluwas kan Regional Trial Court Branch 55 Irosin.
Dugang ni Destacamento na an suspetsado pigkonsiderar na top 10 most wanted kan Police Regional Office 5 huli ta an kaso kaini sarong rebellion na kun saen ini non-bailable o warang pigrekomendang piyansa.
Sa presente nasa kustodiya na kan Criminal Investigation and Detection Group Sorsogon an suspetsado para sa magkakanigong disposisyon.
Mientrastanto, nangapudan an opisyal sa mga natatada pang miyembro kan communist terrorist group na igwa sindang manlaen-laen na programa na makakatabang sa pagbabago kan saindang pamumuhay.
Mantang nangapudan man ini sa mga kajovenesan na dae magpalinlang en kaso na may mag-engganyar sainda na maglaog sa siring na grupo.
