LEGAZPI CITY-Naarestar kan mga otoridad an sarong lalaki sa Barangay Poblacion Rapu Rapu Albay huli sa pambububog sa saiyang agom mantang nasa impluwensiya nin alak.
Segun kay Rapu-Rapu Municipal Police Station Office in Charge Roderick Bino, sa intrevista kan Bombo Radyo Legazpi, an suspek sarong 35-anyos, laborer, asin igwang 4 na aki sa saiyang agom.
Dugang pa kan pulisya, na nasa impluwensiya an suspek nin alak kan magiwal hasta sa nauli sa pambubugbog sa saiya mismong Misis.
Sinangatan man nin kaso an suspek kan Agosto 5 asin naarestar kan Agosto 13, na igwang pigrerekomendang piyansa na P20,000 sa 2 counts na pagbayolar sa Republic Act 9262 o an Anti-Violence Against Women and their Children Act of 2004.
Dagdag pa kan otoridad na kusang nagiba ini sa saindang himpilan asin sa presente nasa kustodiya na ninda an nasambitang suspek.
Mensahe man kan pulisya na natural sa mga mag-agom an magiwal alagad enkaso nasa impluwensya nin arak, dai pagsabaton an init kan payo, dapat na magpahunod, asin bilang sarong lalaki, dapat alagaan asin atamanon an saindang mga agom, asin dai pagkulugon alagad padabaon an mga ini.
