LEGAZPI CITY-Arestado an sarong lalaki huli sa paghahabon nin body spray asin whitening soap sa sarong establisimyento sa Barangay Dinagaan Legazpi City.
Segun kay Police Executive Master Sergeant Carlos Paña, sa intrevista kan Bombo Radyo Legazpi, binisto an suspek bilang si alyas “Makoy”, warang trabaho asin residente kan Barangay Pigcale Legazpi City.
Naarestar suboot an suspek mantang paluwas na sa establisimyento bitbit an 2 body spray asin whitening soap na igwang kantidad na P700, alagad an hagadan siya nin resibo kan security guard, wara ining maipahiling.
Katuwang an mga kapulisan sa mismong area, tulos man na binasahan nin mga direchos an suspek bago idinara sa himpilan kan Legazpi City Police Station.
Mahahampang an suspek sa kasong theft asin sa presente nasa himpilan na ini para sa resolusyon na isasangat kan piskalya.
Dugang pa kan opisyal na malaog man giraray sa kasong theft an kaso huli sa panghahabon man giraray an ginibo akn suspek.
Dati na man suboot na nakulong an suspek asin nakaluwas sa presinto alagad, pareho man giraray an saiyang mga pigsasagibo.
Mensahe man kan opisyal sa publiko na dai na maggibo nin kapareho kaini enkaso warang pambakal na kwarta asin pigaabisuhan man an mga security guard kan mga establisimyento na magin mapagmatyag sa laog kan mga mall huli sa mga posibilidad kan siring kaini na mga insidente.
Mientrastanto, padagos man suboot an koordinasyon kan mga kapulisan sa mga managers, asin security guard ngani maibitaran an siring kaining mga insidente sa laog kan mall sa ciudad.
