LEGAZPI CITY- Dead on arrival sa ospital an sarong lalaki makalihis na pauranan nin bala sa Purok 3 Barangay Talahib sa banwaan kan Daraga.
Binisto kan Daraga Municipal Police Station an biktima na si Ronnie Orje, 44-anyos na residente kan Purok 2 sa nasambitan na lugar.
Pinagbabadil suboot ini kan duwang dae nabistong lalaking suspetsado gamit an dae maaraman na kalibre nin badil.
Nadukayan na sanang duguan an biktima dara kan tama nin bala sa toong pandok asin iba pang parte kan hawak.
Idinalagan pa ini sa ospital alagad dae na nag-abot pang buhay.
Narekober sa crime scene an pitong basyo nin bala asin sarong bala.
Nagpapadagos an imbestigasyon kan nasambitan na pulisya sa nasambitan na krimen.
Ini na an panduwang insidente nin pambabadil sa Daraga ngunyan na semana.
