LEGAZPI CITY – Karsel an bagsak kan sarong High Value Individual pagkatapos ining madakop sa isinagibong Anti Illegal Drug Operation kan Bulan Municipal Police Station.
Segun ki Police Lt. Cololel Virgil Bibat, hepe kan Bulan MPS sa intrevista kan Bombo Radyo Legazpi na naarestar an 39 anyos na suspek makalihis makipagtransaksyon sa sarong poseur buyer na pulis asin pabakalan nin duwang heat-sealed transparent plastic sachet na may laog nin white crystalline substance na pigtutubudang shabu.
An narekober na drug item an pigkakarkulong may timbang na 0.15 gramos na nagkakantidad nin P1000 pesos na tulos dinara sa saindang Provincial Forensic Unit nganing maaraman kun tunay ining mga kontrabando.
Nagin dalan kan mga otoridad sa pagkakadakop kan suspetsado an mga statement kan mga dating kaibahan kaini nin huli ta dati na suboot ining nagsurrender sa saindang mga programa kontra illegal na droga.
Pigtaram man ni Bibat na tulos na pigrerespondehan kan saindang hepatura an sumbong kan publiko nganing maipadagos an saindang pagigin Drug Cleared Municipality.
Sa presente, nasa kustodiya na kan Bulan Municipal Police Station an suspetsado na nahahampang sa kasong pagbayolar sa Article II Section 5, R.A 9165 o an Comprehensive Dangerous Drug Act of 2002.
Pangapodan kaini sa publiko na dae matakot magrani sainda kun may mga aram ining mga personahe na naggagamit kan mga ipinagbabawal na droga nganing matawan ninda ini nin magkakanigong aksyon.
