LEGAZPI CITY—Sarong estudyante an gadan makalihis na makabangga an piglulunadan na motorsiklo sa likod kan nakaparadang mini dump truck sa gilid kan tinampo sa Barangay Tuburan, Cawayan, Masbate.
Segun ki Police Major Joseph Laurio, an chief of police kan Cawayan Municipal Police Station, sa intrevista kan Bombo Radyo Legazpi, an naunambitang duwang behikulo nasa parehong linya kun saen an dump truck nakaparada sa may gilid kan tinampo huli ta flat an rida kaini.
Mantang pigbabaybay kan duwang jovenes na lunad sa motorsiklo an tinampo gikan sa Barangay Tuburan pasiring sa Barangay San Jose sa nasambit na banwaan, dae na nakapreno nin marhay an motor asin digdi na nakabangga an behikulo sa truck.
Posibleng nagin marikas an pagpadalagan kan motor asin dae naaraman na may behikulo sa saindang enotan huli na man sa madiklom asin mauran na panahon sa lugar.
Segun sa opisyal, igwa man suboot na ibinugtak na early warning device an motorsiklo mga sampulong metro gikan sa dump truck alagad an binugtak suboot ‘sanga-sanga’ na sana.
Dinalagan an mga biktima sa hospital alagad an 16-anyos na drayber kan motorsiklo alagad dae na naisalbar pa, mantang an sunad kaining 17-anyos padagos pa man na pigbubulong.
Nagpagiromdom an opisyal sa mga magurang na bantayan an saindang mga aki lalo na an mga menor-de-edad na nagmamaneho nin mga motor, dugang pa kaini na mag-ingat sa pagpapadalagan nin mga behikulo lalo na pag mauran an panahon.
