LEGAZPI CITY—Sarong estudyante an binawian nin buhay mantang duwa an nairido makalihis na buminangga an piglulunadang motorsiklo sa nakaparadang traysikel sa banwaan kan Bato, Catanduanes.
Segun ki Bato MPS, PIO Police Staff Sergeant Renen Delos Reyes, sa intrevista kan Bombo Radyo Legazpi, may naresibi sinda nin sarong apod mapadapit sa sarong aksidente na nangyari sa Barangay San Andres kan nasambitang banwaan.
Pigtaram kan opisyal na an tulong biktima nakalunad sa sarong motorsiklo asin gabos warang sulot na helmet.
Segun sa drayber kan nasambit na lunadan gikan sinda sa Barangay Cabugao asin pasiring sa Bato Rural Health Unit para kuahon an medical certificate kan kairiba kaining 17-anyos, alagad nawaran suboot nin kontrol an saindang behikulo rason para buminangga ini sa sarong nakaparadang traysikel.
Susog man sa mga nakahiling na nagin marikas an pagpapadalagan kan motorsiklo asin tuminalyap suboot an ikatulong lunad kan behikulo na 17-anyos.
Tulos man na dinara an mga biktima sa ospital kun saen an duwang biktima padagos pang pig-oobserbaran, alagad, an kairiba kaining 17-anyos dae na naisalbar pa.
Napag-araman na an 17-anyos na biktima sarong magraduar na estudyante asin makua kuta nin medical certificate para sa saiyang work immersion.
Mientrastanto, masunad man nin mga magkakanigong legal na aksyon an pamilya kan nagadan laban sa 19-anyos na drayber kan motorsiklo.
