LEGAZPI CITY — Nauli sa trahedya an maugma kutang bakasyon makalihis na ma-heat stoke an sarong call center agent sa Subic Daco beach na parte kan Bgy. Calintaan banwaan kan Matnog, Sorgon.
Binisto an biktima na si Francis Silvio, 29 anyos asin residente kan Bgy. Camambugan, Daet, Camarines Norte.
Sa ipinaabot na impormasyon sa Bombo Radyo, nagkakawat nin basketball an biktima sa irarom kan labing init kan aldaw kan bigla na sana ining nawaran nin paghangos asin natumba sa dga.
Naidalagan pa an si Silvio sa Matnog Medicare Community Hospital alagad ipigdeklarar ng dead on arrival.
Dae naman naghagad pa nin autopsy examination an pamilya kan biktima huli sa nagtutubod an mga ini na warang nangyaring foul play alagad nakaekperyensya suboot ini nin heat stroke asin an asphyxia o kawaran nin hinangos an rason kan pagkagadan kan biktima.
