LEGAZPI CITY – Sarong pampasaherong bus an tuminagilid makalihis mabunggo an sarong poste kan kuryente sa Maharlika Highway sa Barangay San Vicente, Castilla, Sorsogon.
Segun ki Castilla Municipal Disaster Risk Reduction and Management Office (MDRRMO) head Edgar Ardales sa intrevista kan Bombo Radyo Legazpi na nagkataon na warang sakay na pasahero an nasabing bus kan mangyari an aksidente asin nagsapo sana nin bukol sa payo an driver.
Pighuna niya na dakol an sakay kan bus kun kaya haros nabunutan siya nin tunok kan nahiling niyang warang sakay an behikulo na buminaligtad.
Basado sa saindang imbestigasyon, maray man an padalagan kan driver sa behikulo asin nagkataon sana na naka-idlip ini kun kaya nabangga kaini an poste.
Pagsaladawan pa kan opisyal na kun nagkataon suboot na may pasahero an nasambitang bus, pwedesir na natusok kan posta an mga ini huli ta naluho kan poste an behikulo sa kusog kan impact kan pagbangga asin may nadamay man na bystander na na-kuryente.
Tulos man na pigshutdown an supply kan kuryente sa nasabing lugar kun kaya wara nang nadamay pa sa aksidente asin napiritang putulon an mga kable kan mga telco companies nganing dae na maggabat an bulos kan trapiko sa lugar.
Sa presente, an naibalik na an supply kan kuryente sa banwaan kan Castilla makalihis an marikas na operasyon kan Sorsogon II Electric Cooperative.
Pagirumdom ni Ardales sa gabos na ibitaran an marikas na pagmamaneho, magpangadyi bago maghali asin mag-ingat nganing makalikay sa ano mang klase nin aksidente.
