LEGAZPI CITY—Irido an sarong babae makalihis na mahulog ini sa pigtutubudang sinkhole sa Barangay Masarawag, Guinobatan, Albay.
Segun ki Margaret Zamora, an biktima na nahulog sa sinkhole, sa intrevista kan Bombo Radyo Legazpi, na pahali na kuta siya sa saindang harong nganing mag-atendir nin sarong orientation, alagad paglakaw niya sa parte kan saindang gate an bigla na sana suboot na nagguho an saiyang natitimakan na daga.
Tulos man suboot sindang naghagad nin tabang sa opisyal kan barangay asin ibang residentes kun saen pinagtarabangan siyang makua gamit an hagdan asin lubid hasta sa dagos na ining mai-angat gikan sa sinkhole.
Tinawan man tulos siya nin first aid kan mga nag-abot na rescuers asin idinara sa ospital.
Sa presente nasa maray nang kamugtakan an biktima asin an saiyang aki na nasa sinapupunan.
Mientrastanto, nangangapudan man an biktima na maresolbaran an nasabing sinkhole huli sa sainda man ining ipigkakatakot asin para man sa saindang kaligtasan.
