LEGAZPI CITY—Bako tugot an sarong animal welfare group na isurender an mga atamang hayop sa dog pound urog na kun nasa maray man na kamugtakan an mga ini.
Segun ki Sorsogon Animal Rescue and Adoption Founder Michelle Pineda, sa intrevista kan Bombo Radyo Legazpi, pigtutukduan kan nasabing lakdang na magin iresponsableng paraataman sinda asin sarong klase nin pang-aabandona sa saindang mga atamang hayop.
Segun saiya na dae dapat pig-engganyar kan mga barangay na isurender kan mga residentes an mga atamang hayop kan asin imbes dapat engganyaron sinda na gibohon an tama sa pag-ataman kan mga ini.
Dugang niya na an kapon an solusyon nganing makontrol an populasyon kan mga atamang ayam asin ikos siring man an pagbabakuna para sa kaligtasan kan komunidad.
Liwat man na tinawan-doon ni Pineda na sa irarom kan Republic Act 8485 o Animal Welfare Act na an pagpapabaya kan hayop an sarong pagbayolar sa ley kan nacion.
Pangapudan man kan opisyal sa mga lokal na gobierno na magkundusir nin mga libreng kapon, bakuna, pagpaparehistro kan mga atamang hayop.
Siring man an pag-isyu nin citation tickets sa may kagsadiri kan mga ini nganing sinda an manimbag huli sa bako kasalan kan mga atamang ayam o ikos an pagdakol ninda sa luwas kundi kasalan ini kan mismong tawo asin sinda mismo an nakakakontrol sa mga ini.
Abiso man niya na kun igwa nin atamang hayop an dapat ining atamanon, alagad kun dae man kaya an dapat dae na sana mag-ataman pa nganing warang pig-iisip na pwedesir nindang pagkahaditan.
