LEGAZPI CITY—Sarong indibiwal an binawian nin buhay mantang tulo an dinara sa ospital makalihis na malason suboot kan kinaon na butete sa Virac Catanduanes.
Segun ki Sto. Cristo, Virac, Catanduanes Barangay Captain Jay Domingo, sa intrevista kan Bombo Radyo Legazpi, na susog sa saiyang paghahapot-hapot sa mga tawo sa saindang barangay napag-araman na an biktima ginibo suboot na pulutan an butete sa sarong inuman, alagad kan ini nagimata hali sa pagturog digdi na nakamati nin pamamanhid sa lawas kun saen binalo pa kuta ining darahon sa ospital alagad dae na naisalbar pa.
Pigtaram kan opisyal na an tulong kairiba kaini dinara man sa ospital kairiba na an sarong aki makalihis na magkaon man suboot kan atay kan butete.
Sa ngunyan nasa maray nang kamugtakan an duwang persona mantang an saro naka-confine pa.
Nagtao naman nin tabang an opisyal sa pamilya kan nagadan.
Mientrastanto, nagpatanid man ini sa publiko na mag-ingat sa mga pigkakaon lalo na an mga pinagbabawal na mga lamang-dagat para maibitaran an siring na insidente.
