LEGAZPI CITY — Hindi na nagibong maisalbar pa kan mga personahes kan Eastern Bicol Medical Center Hospital an backrider kan sarong motorsiklo makalihis na maimbwelto an nasabing behikulo sa banggaan kontra sa sarong truck sa kahalabaan kan tinampo sa Brgy. Hicming, banwaan kan Virac, Catanduanes.
Sa nagunong impormasyon kan Bombo Radyo Legazpi, pigmamanehar ni Incumbent Brgy. Kapitan Leo Teleb kan Brgy. Dugui Too an sarong truck na may plakang GPB-117 pasiring sa Poblacion kan biglang mawaran nin preno na kawsa tanagrig na mabangga ini sa nakasunod na motorsiklo na nagdadalagan sa parehong direksyon asin pigmamanehar ni Arnel Aldea, 34 anyos sakay an backrider na si Mario Quintal, 37 anyos.
Sa kusog kan impact, tuminapok sa sementadong tinampo an mga nakalunad sa motor na kawsa kan pagkairido kan drayber mientras na binalo pa kutang idalagan sa ospital an backrider alagad binawian na nin buhay.
Sa ngonian, nagpapadagos pa an ipigkokondusir na follow-up investigation sa nasabing insidente.
