LEGAZPI CITY—Gadan an sarong indibidwal mantang irido an kaibahan kaini makalihis na pagbabadilon kan dae pa nabibistong persona sa Sitio Burabod, Barangay Taysan, Legazpi City.
Sa pahayag ni Legazpi City Police Station Public Information Officer Police Executive Master Sergeant Carlos Paña, na mantang nag-oolay an duwang biktima sa hampang kan sarong establishimiento may sarong lalaki suboot na nag-agi na may kapot na arak asin may sinindihan ini na iginapo harani sa nasabing establishimiento.
Huli digdi, binukod kan duwang biktima an suspek, alagad, pag-abot sa mabulod na lugar kan nasabing barangay, digdi na nambadil an nasabing suspek.
Binisto an mga biktima na si alyas “Jun”, 33-anyos; mantang an sarong biktima an sarong 34-anyos, asin parehong construction worker.
Natamaan an sarong biktima na si alyas “Jun” sa saiyang liog kun saen nirespondehan man ini kan mga otoridad alagad dae na naisalbar pa.
Mantang an saro pang biktima na yaon presente sa ospital, an may mga tama sa saiyang lawas alagad dae pa maikokonsiderar na tama ini kan bala nin badil.
Dugang ni Paña na basado sa imbestigasyon kan kapulisan, may narekober sindang sarong basyo nin badil na isasairarom sa forensic unit kan mga otoridad.
Mientrastanto, padagos an imbestigasyon kan Legazpi CPS mapadapit sa nasambitang insidente.
