LEGAZPI CITY – Gadan an sarong indibidwal sa nangyaring salpukan kan duwang motorsiklo sa national highway na sakop kan Barangay Catagbacan, San Andres, Catanduanes.
Segun ki San Andres Municipal Police Station Municipal Executive Senior Police Officer Police Executive Master Sergeant Neil Gerona sa intrevista kan Bombo Radyo Legazpi na basado sa isinagibong imbestigasyon an nagluluwas na pigbabaybay kan duwang behikulo an mag-inibong na tinampo.
Napag-araman na hale sa Barangay Cabcab patungong Barangay Catagbacan si alyas Cardo mantang hale sa Barangay Poblacion pasiring sa Barangay Codon an ikaduwang behikulo na pigmamaneho ni alyas Fred mantang angkas man si alyas Ric.
Nagporbar na mag-overtake si alyas Fred sa kasunudan kaining traysikel alagad dae kaini napansin an kasabatan kaining si Cardo na nagkawsa sa naunambitang banggaan.
Pigtaram pa kan opisyal na warang mga sulog na helmet asin wara man na lisensya an imbweltong mga indibidwal kan nangyari an insidente.
Huli sa impact an nagsapo nin mga fracture sa manlain-laing parte kan saiyang hawak si alyas Fred asin si alyas Ric mantang idineklarang dead on arrival man si alyas Cardo huli sa mga tama kaini sa payo.
Isinugod si alyas Fred asin alyas Ric sa JMA Memorial District Hospital asin inilipat sa Catanduanes Doctors Hospital Inc. (CDHI) sa Virac makalihis an pirang oras.
Pagirumdom ni Gerona sa mga driver sa provincia kan Catanduanes na permihang magsulot nin helmet nganing malikayan an head injury enkaso may mangyari sa saindang aksidente sa kakalsadahan.
