LEGAZPI CITY – Buminungkaras an sarong engkwentro kasabay kan pagbubukas kan Independence Day makalihis an nairehistrong panghaharass kan mga pigtutubudang miembro kan rebeldeng New People’s Army (NPA) sa Brgy. Abella, ciudad kan Ligao.
Sa ipinaabot na impormasyon kan Ligao City Police sa Bombo Radyo Legazpi, ala-una kasubagong kan suminakyada an dae pa mabilang an mga rebelde sa Abella detachment kan Philippine Army.
Nagresulta ini sa pagkagadan kan sarong rebelde na wara pang pagkakabisto hasta sa ngonian mientras na wara man na nairehistrong casualty sa tropa kan gobyerno.
Narekober pa sa pinangyarihan kan engkwentro an haralangkaw na kalibre nin badil siring kan M16 rifle, sarong M635, sarong Bandoler, tolong Land mine asin tolong backpack na may laog nin mga subersibong dokumento asin personal na gamit.
Sa ngonian, nagpapadagos pa an imbestigasyon sa nasabing insidente.
