Ibinasura kan Sandiganbayan an graft asin malversation cases kontra ki Janet Napoles asin duwang iba pang dating opisyal katakod kan Priority Development Assistance Fund scam.
Sinabi kan Sandiganbayan Second Division na nagpalyar an prosekusyon na maglatag nin bastanteng ebidensya na guilty sinda Napoles, dating National Livelihood Development Corporation president Gondelina Amata asin assets management division chief Gregoria Buenaventura sa salang paggamit kan P5 million na alokasyon sa PDAF ni dating La Union Representative Victor Francisco Ortega kan 2009.
Sa ibong kaini, magtetenir na nakakulong si Napoles huli ta convicted ini sa iba pang mga kaso.
Basado sa desisyon kan korte, warang documentary evidence na magpapatunay na pagsadiri asin kontrolado ni Napoles an Social Development Program for Farmers Foundation Inc., na sarong bogus non-government organization na nagresibe kan alokasyon sa Priority Development Assistance Fund ni Ortega.
Nagpalyar man suboot an prosekusyon na kumbinsehon an korte na nakinabang sa PDAF transaction sinda Amata asin Buenaventura.
