LEGAZPI CITY-Pinawarang-sala kan Sandiganbayan si dating Vice President Jejomar Binay asin an saiyang aki na si dating Makati Mayor Junjun Binay sa mga kasong graft, falsification of public documents, asin malversation of public funds katakod kan kontrobersyal na P2.2 bilyon sa Makati City Parking Building project.
Segun sa Third Division kan Sandiganbayan, dai napatunayan kan prosekusyon an kasalan kan mga akusado huli sa “beyond reasonable doubt” ini na nagresulta sa saindang pagka-abswelto.
Kaisiba man sa desisyon an pag-hale kan Hold Departure Order laban sa mga Binay asin iba pang akusado.
Dai man pinatawan nincivil liability an mga ini huli sa kawaran nin bastanteng ebidensya.
Si dating Vice President Jejomar Binay an enot nang kinasuhan sa nasambitang proyekto kan siya pa an alkalde kan Makati.
Mantang si Junjun Binay man an huring nagmando kan proyekto kairiba na an mga kontrata na suboot igwang kakulangan sa dokumentasyon asin performance security.
Magigirumduman na an mga kasong isinangat an nagpoon kan taong 2016, matapos an termino ni Binay bilang panduwang presidente kan nacion.
