LEGAZPI CITY — Pig-aadalan pa ki maray ni acting Albay provincial jail warden Ronan Chamberlain “Cham” Zuñiga an posibilidad na pakikipagsabwatan makalihis na makakua nin mga contrabando sa ginibong Oplan Galugad.
Sa intrevista kan Bombo Radyo Legazpi ki Zuñiga, sinabi kaining pig-aadalan pa an posibilidad kan connivance o pagsasabwatan sa pagultan kan preso asin gwardiya o preso asin bisita.
Kasuarin sana kaya, nareparo sa CCTV footage an garong pagpuslit nin kontrabando kun kaya nagkondusir nin galugad na nagresulta sa pagkakadiskubre sa sarong itom na cord, duwang sigarilyo, lighter, improvised tooter, upos nin sigarilyo asin tulong transparent plastic sachet na pigtutubudan na shabu.
Wara pa man sa ngonian an resulta kan ginibong eksaminasyon sa iligal na droga.
Apwera kaini, sinabi pa kan opisyal na nakakua man nin shabu an mga gwardiya sa sarong ina na mabisita kuta sa aki kaini. Nareparo kaya na butog an sulot na sandal kun kaya pig-inspeksyon ini.
Abiso man ni Zuñiga na magsunod an lambang saro, an bisita asin mga preso sa tamang proseso ngani na dae na magkaigwa nin iwal.
Sa ngonian, sinabi kan opisyal na nagpapadagos pa an imbestigasyon katakod kan insidente.
