LEGAZPI CITY — Preparado an Regional Peace and Order Council (RPOC) kan Bicol sa pagtatao nin asistensya sa tropa kan gobyerno katakod kan ipigpapaotob na intensibong pagbabantay sa seguridad kontra sa mga huma kan terorismo asin iba pang lawless groups.
Sa intrevista kan Bombo Radyo Legazpi ki Legazpi City Mayor Noel Rosal na nagtitindog chairman kan RPOC, sienerto kaini an tabang kan konseho sa mga kinakaipuhang ekipahe asin intelligence para sa tropa.
Dugang pa kaining mantenidong naka-alerto an manlaen-laen na pwersa sa rehiyon urog na sa posibilidad kan ilunsar na diversionary tactic kan kalaban.
Katakod kan sitwasyon, nakatalaan man na magpaapod nin meeting an RPOC chairman sa Hunyo 20 tangarig na idiskutir an mga isasagibong lakdang kun saen si National Bureau of Investigation Director Dante Gierran bilang huespe de honor.
Sa ibong na lado, dae man nalingawan kan alkalde na ireconocer an mga pagsasakripisyo kan mga suldado tangarig na maasegurar an seguridad kan mga ciudadano.
