Tinugutan kan Sandiganbayan third division si dating House speaker Martin Romualdez na mag-atendir sa saiyang arraignment asin pre-trial hearing sa paagi kan videoconference hali sa Quezon City jail-male dormitory sa Payatas.
Inaprubaran kan korte an urgent motion kan kampo ni Romualdez asin pigsugo an Quezon City Jail na magtagama nin kinakaipuhan napasilidad, serbisyo asin technical equipment para sa videoconference.
Pigsugo man kan korte an division Clerk of Court na personal na basahon ki Romualdez an kasong nakalaag sa information sa laog mismo kan detention facility.
Sarong assisting counsel ni Romualdez asin sarong miyembro kan prosecution panel an pwedesir na mag-atendir nin personal sa jail facility, mantang an iba pang abogado asin prosecutors an kaipuhan na nasa Sandiganbayan courtroom.
Naarestar si Romualdez kan Setyembre 7 makalihis magpaluwas nin warrant of arrest an Sandiganbayan katakod kan P7.4-bilyong plunder case na ipigsunad kan Ombudsman.
Hali sa Cardinal Santos Medical center, ipiglipat siya sa UP-Philippine General Hospital para sa independent medical examination antes dinara sa QC jail kan Lunes.
Sa presente, nasa infirmary ward si Romualdez asin magtetenir duman mantang kinakaipuhan an medical supervision.
Segun sa mga otoridad, nakadependa sa saindang medical evaluation kun nuarin siya ililipat sa regular na selda.
