LEGAZPI CITY- Grandioso an nagin pagbubukas kan ika-25 taon kan selebrasyon kan Rodeo Festival sa provincia kan Masbate.
Rinibong turista an nakisumaro sa pagbubukas kan kapiestahan na hale pa sa manlaen-laen na provincia kan Bicol tangarig na mahiling an mga nakapreparar na pakulo kan host province.
Nagpatalbugan an mga estudyante hale sa mga academic institutions kan provincia para sa Festival of Festivals o street dancing competition sulot an makokolor na costumes na gibo sa native materials kun saen naiuli kan Lapay Bantigue Fest sa ciudad kan Masbate an top prize na nagkakantidad nin P1 million.
Labi man an pag-orgulyo asin kaogmahan ni Department of Tourism Bicol Director Benjie Santiago sa pagdalan kan inapod kaining ‘spectacular crowd drawer’.
Afuera man sa makolor na opening, piglalaoman pa an pagdagsa kan dakol na numero kan turista urog na sa pinakaabangang pakikipag-wrestling sa tradisyon na Rodeo Masbatenyo kun saen nagigin ‘cowboy’ an mga residente.
