LEGAZPI CITY – Kumpiyansa an City Government kan Tabaco sa Albay na ‘substantial’ an progreso kan dagos-dagos na road clearing operations kontra sa mga nakakaulang sa tinampo sa nasasakupang lugar.
Magigirumduman na susog sa ibinabang Department of Interior and Local Government (DILG) Memorandum Order 2019-121 piglalaomang hasta sa katapusan na sana kan Setyembre an deadline sa lakdang.
Segun ki Mayor Krisel Lagman-Luistro sa Bombo Radyo Legazpi, semanahan man an ipigsasagibong reporting sa DILG sa implementasyon kan esfuersos sa national, provincial, municipal asin city roads.
Ikinaogma man kan alkalde an pagigin compliant kan mga establisyemento de negosyo na kusang nag-dismantle kan mga propriedad na naglalaog na sa tinampo.
Inomaw man kaini an pagigin ehemplo kan mga barangay officials sa paghali kan mga barangay outpost na nagsisirbing road obstruction.
Sa ibong kaini, inako man kan alkalde na bako 100% makaka-comply an ciudad sa paghali kan mga nakaulang sa tinampo partikular na sa mga apektadong kan residentes urog na wara mang maitataong asistensyang pinansyal sa pagcompensate kan madedestrosong parte kan harong.
