Rinibong mga tawo sa Denmark asin Greenland an nagprotesta nganing kontrahon an propuesto ni U.S. President Donald Trump na bakalon an Greenland sa Denmark, na nagdoon na an Arctic territory mismo ab dapat na magdesisyon kan sadiring futuro.
Sa Copenhagen, an mga demonstrador nagmartsa pasiring sa embahada kan Estados Unidos, na nagkakanta nin “Greenland is not for sale” asin nagdara nin mga banner na nakasurat na “No means No” asin “Hands off Greenland”, kaiba an pula-asin-puti na bandera kan Greenland.
May pirang nagsulot man nin baseball caps na kahawig sa “Make America Great Again” ni Trump, alagad may nakasurat na “Make America Go Away”.
Pigkakarkulo na labi 20,000 katawo an nag-atender sa protesta sa Copenhagen, na haros kapareho kan populasyon kan kabisera kan Greenland na Nuuk, mantang an mas dikit na bilang nin mga nagpoprotesta nangyari sa ibang parte kan Denmark.
Sa Nuuk, ginatos na mga demonstrador, kaiba si Prime Minister Jens-Frederik Nielsen, an nagmartsa pasiring sa konsulado kan Estados Unidos, na may kapot na mga bandera asin banner.
Magigirumduman na sinabi ni Trump na an Greenland importante sa seguridad kan Estados Unidos huli sa estratehikong lokasyon asin yamang mineral kaini, asin dai pigtatanggal an posibilidad na gamiton an military force nganing makuwa ini.
An pahayag ni Trump nagkawsa nin diplomatic crisis sa pagultangan kan Estados Unidos asin Denmark, na kinondenar kan NATO.
An Greenland, na may populasyon na 57,000, igwa nin dakulang autonomy poon pa kan 1979 alagad nagtetenir na nasa irarom kan kontrol kan Denmark pag-abot sa depensa asin foreign policy.
Poco mas o menos 17,000 na Greenlanders an nakaistar sa Denmark, asin an gabos na limang partido sa Greenland parliament pabor sa pagguno nin independensya sa maabot na panahon, sa ibong kan mas gusto nindang magtenir sa Denmark imbes na makisumaro sa Amerika.
